Daeth y gwneuthurwr pypedau, a myfyriwr graddedig Cynllunio
Theatr CBCDC, Rachael Canning â stori tylwyth teg llawn “sudd,
chwant a thân” i Gaerdydd y penwythnos hwn gyda’i sioe deithiol
The Girl with the Iron Claws.
Cyflwyniad dyfeisgar o stori tylwyth teg Lychlynnaidd dywyll
yw’r sioe, sy’n cynnwys pypedwaith, cerddoriaeth a hiwmor. Y cwmni
sy’n gyfrifol am y sioe yw The Wrong Crowd - a ffurfiwyd gan
Rachael a’r awdur/cyfarwyddwr Hannah Mulder.
Ers graddio o CBCDC mae gwaith Rachael wedi cynnwys cynllunio a
chyfarwyddo pypedau ar gyfer nifer o gynyrchiadau, yn cynnwys
Magical Night i’r Royal Opera House, The City
Madam i’r RSC ac Into the Woods yn Theatr Awyr Agored
Regent’s Park.
Dywedodd Rachael “Ar gyfer ein sioe gyntaf rydym yn ail-adrodd
chwedl rymus. Rydym yn frwd o blaid yr hen storïau yma a’r hyn sydd
ganddynt i’w gynnig i gynulleidfaoedd modern, yn hen ac ifanc.
Cafodd llawer o gynnwys llai pleserus y storïau cyfoethog hyn eu
tynnu allan gan bobl oes Victoria ac rydym am archwilio fersiynau
cynharach a chwistrellu peth o’r sudd, chwant a thân yn ôl
iddynt.”
Os oes gennych ddiddordeb mewn pypedwaith, dewch draw i’r sioe
bypedwaith flynyddol yr haf hwn a gweld gwaith cynllunwyr theatr y
dyfodol.