MA Theatr Gerddorol
Deuddeg Mis
Mae theatr gerddorol yn ffynnu a does dim diffyg cyfleoedd
gwaith i berfformwyr dawnus wedi eu hyfforddi mewn actio, canu a
dawnsio. Mae’r rhaglen newydd, arbenigol hon yn adeiladu ar sail
record gref iawn CBCDC mewn paratoi cantorion ac actorion ar gyfer
gyrfa lwyddiannus mewn theatr gerddorol ac mae’n cynnwys
hyfforddiant dwys ym mhob un o’r tair disgyblaeth graidd. Mae
gwersi un-i-un yn canolbwyntio ar dechneg canu, repertoire a
chyfathrebu trwy gân. Mewn gweithdai, byddwch yn dysgu sgiliau
dawnsio a symud penodol y genre, tra bod dosbarthiadau actio yn
canolbwyntio’n neilltuol ar gymeriadu, gweithio’n effeithiol mewn
ensemble, ac adeiladu perthynas gyda chynulleidfa. Bydd cyfleoedd
perfformio cyhoeddus yn amrywio o gynyrchiadau agos-atoch i rai
graddfa-fawr, gyda repertoire amrywiol. Bydd pob myfyriwr yn cymryd
rhan mewn cyfres o gyflwyniadau stondin swyddogol yng Nghaerdydd a
Llundain, sy’n cynnig cyfle i berfformio ar gyfer asiantiaid,
cyfarwyddwyr castio a darpar-gyflogwyr eraill.
Gofynion Mynediad
Detholir ar sail gwrandawiadau. Fel rheol, dylai ymgeiswyr fod
wedi cwblhau rhaglen is-raddedig yn y celfyddydau perfformio. Bydd
ymgeiswyr angen sgiliau cryf yn y tair disgyblaeth – actio, canu a
dawnsio – gyda lefel eithriadol o allu mewn dwy o leiaf.
Byddwn hefyd yn ystyried ymgeiswyr heb gymwysterau ffurfiol ond
sydd yn gallu arddangos potensial proffesiynol yn y tair
disgyblaeth.
Sut Mae Ymgeisio
I gael mynediad i’r gwrs yma, rhaid ymgeisio’n uniongyrchol i’r
coleg gan ddefnyddio ein ffurflen gais.
Taliadau
Yn amodol ar gymeradwyaeth Bwrdd y Llywodraethwyr, y tâl rhaglen
ar gyfer myfyrwyr o’r DU yn cychwyn ym mis Ionawr 2011 fydd
£11,200.