• Amdanom Ni
• Cyrsiau
• Bywyd Myfyrwyr
• Addysg Cyfrwng Cymraeg

BA (Anrh) Cynllunio Theatr

Tair Blynedd

Mae’r rhaglen hon yn cynnig cyflwyniad heriol i ddamcaniaeth ac arfer cynllunio cysylltiedig â pherfformiad. Mae tîm y coleg o diwtoriaid proffesiynol profiadol yn cynnig hyfforddiant arbenigol mewn darlunio technegol, CAD, torri patrymau, creu gwisgoedd, gwneud hetiau, teilwriaeth, gwneud modelau, adeiladu a gweithredu pypedau, celf olygfaol a gwneud celfi llwyfan. Mae’r rhaglen yn hyblyg iawn, sy’n caniatáu i fyfyrwyr ganolbwyntio ar feysydd o ddiddordeb neilltuol trwy ddosbarthiadau sgiliau uwch, projectau cysyniadol a gwaith seiliedig ar berfformio yn yr ail a’r drydedd flwyddyn. Mae astudiaethau hanesyddol a chyd-destunol yn rhan bwysig o’r hyfforddiant, ac anogir myfyrwyr i ymchwilio a myfyrio ar eu harfer eu hunain. Mae’r rhaglen yn cynnwys teithiau maes, darlithiau a seminarau yn canolbwyntio ar ddatblygiadau pwysig yn hanes y theatr, celf, pensaernïaeth, cynllunio a gwisgoedd.

Gofynion Mynediad

Disgwylir i ymgeiswyr fod â, neu fod wrthi’n astudio am, Lefelau Uwch neu gymhwyster cyfwerth fel Lefel Uwch yr Alban, Diploma/Tystysgrif Cenedlaethol BTEC, CBC, Bagloriaeth Ryngwladol, GNVQ Uwch, TAAU neu Ddiploma Uwch (lefel 3).

Gallwn ystyried ceisiadau gan bobl heb gymwysterau ffurfiol os gallant arddangos lefel eithriadol o allu ymarferol.

Dylai ymgeiswyr fod â chymwyster mewn Celf a Dylunio (neu fod wrthi’n astudio am un), sef cwrs celf sylfaen blwyddyn o hyd fel arfer.

Detholir yn derfynol ar sail cyfweliad a chyflwyniad portffolio.

Sut Mae Ymgeisio

Dylid ymgeisio ar gyfer y cwrs yma drwy Wasanaeth Mynediad y Prifysgolion a’r Colegau, UCAS.

Os ydych yn yr ysgol neu mewn coleg yn y DU, rhaid i chi gael cyfrinair gan eich athro/athrawes neu gynghorydd gyrfaoedd er mwyn cofrestru gydag UCAS. Os ydych yn ymgeisydd annibynnol neu’n byw y tu allan i’r DU, dylech ddefnyddio system ymgeisio ar-lein UCAS, www.ucas.com. Y tâl am y gwasanaeth yma yw £11 i ymgeisio am un cwrs neu £21 am hyd at bum cwrs. Dylech ddefnyddio adran ‘datganiad personol’ ffurflen UCAS i arddangos diddordeb profedig a phrofiad perthnasol yn eich dewis faes. Ar gyfer cyrsiau sy’n dechrau ym mis Medi 2011, dylech anfon eich cais erbyn y 15fed o Ionawr 2011. Dim ond os oes llefydd ar gael o hyd y gallwn dderbyn ceisiadau ar ôl y dyddiad yma. Rydym yn argymell y dylech ymgeisio cyn gynted â phosib.

Taliadau

Mae’r tâl hyfforddiant blynyddol ar gyfer myfyrwyr o’r DU ar bob cwrs i is-raddedigion yng Ngholeg Brenhinol Cerdd a Drama Cymru wedi ei bennu gan Lywodraeth y Cynulliad yn unol â phrifysgolion a cholegau eraill yng Nghymru. Mae’r tâl hyfforddi yn £3,290 y flwyddyn am mynediad yn 2010.